LITANIE DELLA PASSIONE

Jesu dulcissime, in horto moestus, Patrem orans, et in agonia positus, sanguineum sudorem effundens; miserere nobis.

     Miserere nostri, Domine, miserere nostri.

Jesu dulcissime, osculo traditoris in manus impiorum traditus, et tamquam latro captus, et a discipulis derelictus; miserere nobis.

     Miserere nostri, Domine, miserere nostri.

Jesu dulcissime, ab iniquo Iudeorum concilio reus mortis acclamatus, ad Pilatum tamquam malefactor ductus, ab iniquo Herode spretus et delusus; miserere nobis.

     Miserere nostri, Domine, miserere nostri.

Jesu dulcissime, vestibus denudatus, et in columna crudelissime flagellatus; miserere nobis.

     Miserere nostri, Domine, miserere nostri.

Jesu dulcissime, spinis coronatus colaphis caesus, arundine percussus, facie velatus, veste purpurea circumdatus, multipliciter derisus, et opprobriis saturatus; miserere nobis.

     Miserere nostri, Domine, miserere nostri.

Jesu dulcissime, latroni Barabae postpositus, a Judeis reprobatus, et ad mortem Crucis iniuste condemnatus; miserere nobis.

     Miserere nostri, Domine, miserere nostri.

Jesu dulcissime, ligno Crucis oneratus, et ad locum supplicii tamquam ovis ad occisionem ductus; miserere nobis.

     Miserere nostri, Domine, miserere nostri.

Jesu dulcissime, inter latrones deputatus, blasphematus, et derisus, felle et aceto potatus; et horribilibus tormentis ab hora sexta usque ad horam nonam in Ligno cruciatus; miserere nobis.

     Miserere nostri, Domine, miserere nostri.

Jesu dulcissime, in patibulo Crucis mortuus, et coram tua SS. Matre lancea perforatus, simul sanguinem et aquam emittens; miserere nobis.

     Miserere nostri, Domine, miserere nostri.

Jesu dulcissime, de Cruce depositus, et lacrymis maestissimae Virginis Matris tuae perfusus ; miserere nobis.

     Miserere nostri, Domine, miserere nostri.

Jesu dulcissime, plagis circumdatus, quinque vulneribus signatus, aromatibus conditus, et in sepulchro repositus; miserere nobis.

     Miserere nostri, Domine, miserere nostri.

Vere languores nostros ipse tulit.

Et dolores nostros ipse portavit.